Б.Дэлгэрсайхан: АНУ-ын нислэг нь Монгол Улс дэлхийтэй харилцах шинэ гарц, боломжийг нээнэ

АНУ-ын агаарын тээврийн томоохон компаниудын нэг болох United Airlines нь өчигдрөөс Токиогийн Нарита нисэх буудлаар дамжин, АНУ-аас Монгол Улсын Улаанбаатар хот руу шууд нислэг үйлдэж эхэллээ. United Airlines нь Монгол Улс руу тогтмол нислэг үйлдэж эхэлсэн Америкийн анхны бөгөөд цорын ганц авиа компани болж байна. Хорь гаруй жилийн өмнөөс яригдсан ч ажил бололгүй өнөөг хүрсэн Монгол Америкийн хооронд шууд нислэг ийн хийгдэж эхэлснээр Монгол Улс АНУ-ын хооронд агаарын шууд харилцааг өргөжүүлэх, иргэдийн зорчих боломжийг нэмэгдүүлэх, бизнес, аялал жуулчлал, соёлын харилцааг бэхжүүлэхэд чухал хувь нэмэр оруулах боломжийг нээж байна.

Зам, тээврийн сайд Б.Дэлгэрсайхан: АНУ-ын нислэг нь Монгол Улс дэлхийтэй харилцах шинэ гарц төдийгүй салбар бүрт шинэ боломжийг нээх болно.

“United Arilines” компанийн анхны нислэгийн нээлтийн арга хэмжээнд Зам, тээврийн сайд Б.Дэлгэрсайханы хэлсэн үгийг бүрэн эхээр нь нийтэлж байна.
Эрхэм хүндэт зочид, төлөөлөгчид өө,
Та бүхэнд энэ өглөөний мэндийг дэвшүүлье!

Монгол Улсын Засгийн газраас агаарын харилцааг либералчлах бодлого баримтлаж, 2023-2025 оныг “Монголд зочлох жил” болгон зарласнаар бид сүүлийн хоёр жилд 11 улстай шинээр агаарын харилцааны хэлэлцээр байгуулсан.
2023 онд Монгол Улсын Ерөнхий сайд Л.Оюун-Эрдэнэ Америкийн Нэгдсэн Улсад хийсэн айлчлалын үеэр байгуулсан Агаарын тээврийн хэлэлцээрийн дагуу өнөөдөр Монгол Улсын гуравдагч хөрш Америкийн Нэгдсэн Улсын “Юнайтэд Эйрлайнс” агаарын тээвэрлэгч Улаанбатар чиглэлд анхны нислэгээ эхлүүлж байгаад баяртай байна.
Америкийн Нэгдсэн Улсын иргэд, жуулчид төдийгүй Монгол Улсаас АНУ-д сурч, амьдарч байгаа манай иргэдийг хоёр орны хооронд дэлхийн топ агаарын тээвэрлэгчийн нислэгээр түргэн шуурхай, тав тухтай зорчих боломж нээгдэж, холын Америк бидэнд ойртлоо.
Энэхүү нислэг нь Монгол Улс дэлхийтэй харилцах шинэ гарц төдийгүй агаарын харилцааг өргөжүүлэх, олон улсын тээвэр логистикийн сүлжээнд идэвхтэй, нөлөө бүхий оролцогч болохоор хийж буй ахиц дэвшлийн илэрхийлэл юм. Шинэ чиглэл нээгдсэнээр худалдаа, аялал жуулчлал, боловсрол, хөрөнгө оруулалт зэрэг манай улсын эдийн засгийн өсөлт, хөгжилд онцгой чухал салбаруудад шинэ боломж, шинэ гарц нээнэ гэдэгт итгэж байна.
“Юнайтэд Эйрлайнс”-ын хамт олонд дахин баяр хүргэе. Бид цаашид олон жилийн турш харилцан ашигтай хамтын ажиллагааг үргэлжлүүлэн хөгжүүлнэ гэдэгт итгэлтэй байна.
“Юнайтэд Эйрлайнс”-Монголд тавтай морилоно уу. Монголчууд бидний хэлдгээр Мөнгөн цагаан хүлгийн тань хөөрөх тэнгэр нь цэлмэг, буулт нь үргэлж зөөлөн байх болтугай хэмээн ерөөе!
Aгаарын зам нь мөнхөд цэлмэг нислэг нь саадгүй
буулт нь зөөлөн байх болтугай!